السلام عليكم
شحالكم بنآآت
ادري وايد مقصره ف حق
المدونة بس هالتقصير كان وراه هدف اني كنت
استخدم كذا برودكت (منتج) واكيد
هالشي يباله وقت لين
اكتب عن البرودكت ريفيو بشكل مفصل ودقيق ف عسب جذي تأخرت عنكم المهم ريفيو طويل روحي سويلج قهوة واستمتعي بالقراية ؛ وان شاء الله الريفيو ييعيبكم
ريفيو عن كيراتين
كيوماكس برازيلي x-liso
pro keratin-Qmax
شو هو سر كيراتين كيوماكس ؟ ان الكيراتين يخلي مظهر خصل الشعر فيه حيوية
ونعومة لانها توزع الشحنات الكهربائية في خصال الشعر وبجذي يكون الشعر فيه لمعان
ونعومة وترطيب لانه يحتوي على مكونات :-
جوز الهند البرازيلي وعناصر طبيعية من اوميغا 3 واوميغا 6 وحامض اللينولين الغني ب فيتامين f واهم مكون
انه الكيراتين خال من الفورمالدهاي
فائدة المكونات :-تساعد في اصلاح التلف
تشكل طبقة واقية من عوامل الخارجية ؛ يعطي للشعر قوة
طريقة الاستخدام :-المرحلة الأولى
تغسلين شعرج مرتين ب شامبو كيراتين
(مرطب)
بعدين تنشفين شعرج بالفوطة وعقب ب مجفف الشعر
(الاستشوار) بالهواء البارد مو الحار تنشفين 80%
بعدين تقسمين شعر الى 4 اقسام عشان يكون سهل عليج العملية .
المرحلة الثانية :-تحطين الكمية اللي تحتاجينه في وعاء بلاستيك حسب طول شعرج
مثال:-
لشعر القصير- المتوسط 40 مل
لشعرالطويل 50 مل
لشعر الطويل والكثيف 60 مل
نرد للخطوات نلبس قلفز (القفازات) <<< ضروري يا بنات
ناخذ
خصل رقيقه بمشط اسنانه دقيقة و نوزع كيراتين على الشعر ضروري الخصله ما تزيد
عن واحد سم نوزع بهالطريقة على الشعر كامل من الجذور حتى الاطراف لكن تجنبي عالفروة
بعد ما توزعينه دلكي الشعر لين يتوزع على كل الشعر وخلاف اتريي لمدة 30-40 دقيقة
بعدين نمشط الشعر بمشط اللي اسنانه كبيره بعدين نرد ناخذ خصله خصله ونمرر عليه
السيراميك الشعر حوالي من 8-10 مرات على نفس الخصله ولازم درجة حرارة السيراميك
اتكون مناسبة لنوعية الشعر مثلا اللي شعرها صحي تستخدم درجة حرارة 230 اما الشعر
التآلف 190 درجة بعد ما تمررون السيراميك على كامل الشعر تغسلون الشعر بماي بس وتردون
تنشفونه .
المرحلة الثالثة :-
ماسك الاصلاح
نوزعه على كل الشعر مع التمشيط لمدة 5 دقايق
ونجفف الشعر بالاستشوار وبجذي نكون خلصنا
الحين بحط لكم ملاحظات وبوضح كذا شغله
تجربتي للكراتين كانت ناجحه ليش لاني اتبعت التعليمات بالضبط واللي حسيته بشعري انه خفف لي نفشة حتى لو ما
استشور شعري كان شكله عادي مثل اي شعري صحي
سويت لعمري كيراتين فالبيت اما من ناحية الوقت خذ من وقتي
3-4 ساعات شي متعب جدا اذا فكرتوا تجربون انصحكم اتسوون فالصالون ملاحظة مهمة اذا
كنتي من النوع اللي شعرها ناعم كيرلي او جاف وكيرلي جربي اما اذا كنتي من النوع
اللي شعرها جاااااف وتالف وكيرلي اي ملمسه خشن اقولج لا لا تجربين لانج بس بتخسرين
فلوسج عالفاضي شفت التجربة على صديقتي
من الايجابيات المنتج :-
بعد ما جربت استشور شعري والله يا
بنات بكل امانه كنت خلال 8-10 دقايق انا مخلصه شعري واذكركم انه كيراتين خال من
الفورمالدهايد اي انه يوم تستخدمون السيراميك ما بتجوفون دخان يظهر من شعركم يعني آمن
وفالنهاية اتمنى هالموضوع ينفعكم ولا تنسون تشتركون فالمدونة تضغطون على متابعة وبعد لا تنسون تضيفوني ف كرما لا امرا اضغطوا >>> انستقرام و سناب جات نفس اليوزر وسموحه طولت
عليكم
